盧斯達：未打先諗點退場

ifg

未打先諗點退場

大學生罷課，為左咩？理論上罷工、罷課、罷市，係為左製造管治危機，令當權者讓步。罷課，係手段；令當權者返落段同村民講數，係個目標。係一個討論罷課既post裡面，發現易汶健竟然話「點退場倒是真問題」，一睇，即時屌左出黎。

果頭先有人講，學生唔可以重滔覆轍，唔可以係掌聲裡面退場，光榮失敗；果頭就已經有左膠現形。罷課第一日就已經諗點樣退場，咁依家佢地係台上聲嘶力竭，係做緊咩？搞罷課唔係為左爭取中國重新考慮政改決定咩？原來罷課只係為左集會講talk，唔係為左個目標架？個目標都未見到，就諗住點樣光榮失敗架？咁你不如係屋企打飛機抗議啦，都一樣既者，都係行為藝術，唔使搞到咁大陣仗，攞人地啲GPA黎較飛，好好玩咩？次次都係咁，係「群眾」面前就豪情萬丈，實際上就係等緊收工，呢啲叫做虛偽，叫做無恥，叫做沽名釣譽。

易汶健何許人也？果次新移民上電視大灑狗血，話自己牛肉/牛油都無錢買俾個仔，點知後面張上格床有盒超貴模型，搞到聞者炒蝦拆蟹，屌哂鬼，易汶健咪就係係獨媒寫膠文護短果個囉。

講真，話呢啲人係左膠，都係名不乎實既。此等「社運人」唔係夢裡不知身是客，佢地唔係真心熱血膠。佢地係「抗爭」岩岩開始既時候就已經諗定點樣光榮失敗。係好清醒的。

如何退場，以漂亮的失敗姿態退場是也。此等實乃社運寄生蟲，件事究竟係新界東北、反國教、反對人大決定，都佢地黎講係無分別架！等於社會主義行動係任何事件都會撲出黎籌錢一樣。對社運寄生蟲黎講，一次又一次既社會危機、一次又一次既社會運動，只係佢地出show既背景。一有運動，佢地就有機會出黎唱歌、講talk、搞活動、做文章、曝光⋯⋯究竟點樣先可以成功？我唔知，你唔知，佢都唔知。但唔同既係，佢地會企出黎過領袖癮、過組織癮。佢地心裡面早就打定輸數，所以先會早早就諗定幾時收皮。

係運動過程裡面，呢班人可以累積社運資本同曝光率，方便自己入ngo 、智庫、去寫報紙專欄，諸如此類。係呢啲活動裡面，星光熠熠、名人處處，個個係來自政黨、係教授、係傳媒，建立personal network，先係正經。社運裙帶，自己友就係自己友。左仔炒iPhone都振振有辭。

識人係好過識字。你識人，就係「文化人」。寫啲垃圾、無貨賣、江郎才盡，《明報》都會個個星期登，係咪？

所以有人未打就諗住幾時走人，真係唔好出奇。你去抗爭，佢係黎發展組織、發展個人，簡單黎講係搞生意。It is all about business, stupid. 你批評佢咩，佢會反問你做過咩。社運寄生蟲認為自己寄生吸血都叫做做過野、傳播左民主火種，係值得自豪的。what makes them greater than us? 因為佢地係一場一場抗爭裡面吸取左資源同名聲。你以為左膠係膠，係唔知自己做咩？唔係，佢地從來好明白自己做緊咩。場運動成效係點？They just don’t care！

source: http://dadazim.com/journal/2014/09/go-home-la/